مرکز کی بی جے پی حکومت میں ہر سال بڑے مقابلہ جاتی امتحانات میں پیپر لیک ہونے کی وجہ سے لاکھوں طلباء کا مستقبل تباہ ہو رہا ہے: انل بھاردواج
نئی دہلی: دہلی پردیش کانگریس کمیٹی کے صدر دیویندر یادو کی ایما پر ریاستی کانگریس کے دفتر، راجیو بھون میں کانگریس کے سینئر لیڈر راہل گاندھی کی طرف سے چلائی جا رہی ’چھاتروں کی گونج ‘ مہم کے تحت 9 اگست 2026 کو دہلی میں منعقد ہونے والے بڑے پروگرام کی تیاریوں کا جائزہ لینے کے لیے ایک اہم میٹنگ کا انعقاد کیا گیا، جس میں خصوصی طور پر آل انڈیا کانگریس کمیٹی کے سکریٹری، دہلی کے شریک انچارج دانش ابرار، ریاستی کانگریس جنرل سکریٹری انل بھاردواج، دہلی کانگریس اقلیتی شعبہ کے چیئرمین عبد الواحد قریشی انڈین یوتھ کانگریس کے جنرل سکریٹری وکاس چھکارا، آل انڈیا این ایس یو آئی کے جنرل سکریٹری اونیش شرما نے شرکت کی۔
اس موقع پر انل بھاردواج نے کہا، ’’مرکز کی بی جے پی حکومت میں ہر سال بڑے مقابلہ جاتی امتحانات میں پیپر لیک ہونے کی وجہ سے لاکھوں طلباء کا مستقبل تباہ ہو رہا ہے۔ اس سال کا نیٹ پیپر لیک ہونا مودی حکومت کے اقتدار میں آنے کے بعد گزشتہ 12 سالوں میں 90 واں واقعہ تھا۔ ہمارے لیڈر راہل گاندھی 25 جون سے 9 اگست تک ملک بھر کی 28 ریاستوں اور 28 شہروں میں نیٹ پیپر لیک ہونے میں ناکامیوں اور امتحانات میں بدعنوانی کے خلاف ملک گیر مہم شروع کر رہے ہیں۔ تاہم طلباء کے مستقبل کو بچانے کے لیے راہل گاندھی کے ذریعے منعقد کیے گئے ’چھاتروں کی گونج‘ پروگرام کی تیاریوں کے لیے دہلی میں 2 جولائی سے 6 جولائی تک اسمبلی حلقوں میں پروگرام منعقد کیے جائیں گے۔‘‘
انل بھاردواج نے کہا کہ یہ بی جے پی حکومت کی مرکزی قیادت کی ہٹ دھرمی کی ایک مثال ہے کہ مرکزی وزیر تعلیم دھرمیندر پردھان، جو لاکھوں طلبہ کے مستقبل کے ساتھ کھلواڑ، امتحان میں دھاندلی، پیپر لیک اور بدعنوانی کے براہ راست ذمہ دار ہیں، نے ابھی تک استعفیٰ نہیں دیا ہے۔ انہوں نے کہا کہ راہل گاندھی کی آواز پر ’چھاتروں کی گونج‘ پروگرام میں امتحانات میں بدعنوانی اور پیپر لیک ہونے کے معاملات کی منصفانہ تحقیقات، نیشنل ٹیسٹنگ ایجنسی کے کام میں شفافیت اور جوابدہی اور تعلیمی نظام اور مستقبل سے متعلق مسائل پر نوجوانوں کو متحد کرنا ہمارے خاص مطالبات ہیں جنہیں ہم دہلی میں منعقد ’’چھاتروں کی گونج‘‘ کے ہر پروگرام میں اٹھا رہے ہیں۔
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
